hjunep

Kembex mex sorak ketak?
Aku te palex six acong galak

Makat de pantok panci?
Anakke te sebox si bebai

Kembex mex mate rerex?
Arax sopox cerite bonyex

Ndex arax kepeng?
Ye ampoxne ngendeng

Ndek na arax girang?
Ye ampoxne bosan

Makat ne momot doang?
Ye dex tao sembahyang

Ape meno kemelexne?
Ndexne bedue kemelexan

Kembex ndexne mangan?
Agen ndaxne begawean

Kembexne ndex begawean?
Melene jari datu tuan

Masih arak ketoanang?
Semaixne jari dengan jogang

Jogjakarta, 29.02.08 Jam 17.28 WIB

Lox Cingang melakne mangan
Tolang bagex getexne jangke congang
Tiox jelo lalo begawean
Nambah lex rau marax pongoran

Ndex arax dengan upaxn
Nggak ambon dit jagung kulut mauxn
Lagux Cingang terus begawean
Ndarax jamax taoxne silainan

Sopox jelo tebengkex sibaturn
Lalo begawean sax te upax kepeng
Sejelo dua lex dalem kapal
Beriuk kance satak dengan

Ngutax ngoron bilang mangan
Ndexne kaso te gerepexkang
Lex parek manux ngongkong
Selapux tesurux nyemporon

Basax kelambi basax awak
Wah sanggup te liwat aix
Berempak telu kali
Ndek te kanggo lio mudi

Barux sejelo lex sedin gawah
Kelambi ndekman gero
Selapuk ribut bekerarian
Lox Cingang tepu ndexne taox ape

Pulisi dateng, Lox Cingang tebau
Basen ndexne ketaon, nggakne kmos doang
Ruen te mesakakenang
Lagux tetap tipax bui tetamang.

Sebulan dua ndarax tadah jari pesakitan,
Ngeraos ndex tao, balen lex mbe jagah
Untung arax dengan Kopang
Jari pejabat lex perwakilan

Nangis semeton olex Kopang
Lox Cingang bengax dex keruan
Ndex sue, taget marax gitax setan
Tiang lex Malaysie? Ongkatne beketoan
Jogjakarta, 29.02.08 Jam 20.10 WIB

Kanak mancing lex kokok Kelayu
Maux mpax sax ndex wahne gitax
Ulah ongkatne bekoak
Lain ndung ongkat dengan

Malik ne mancing lex sedin julu
Maux mpax belexan six sax barux senux
Ulah onkatne sorak
La, tetune ongkat dengan

Mno cerita sax leman laex tepesualang
Lamun kodex bedeng teparan lindung
Tuna senuxn sax tepancing mudian
Miripn lagux belexan jari lain aran dengan
Jogjakarta, 29.02.08 Jam 19.36 WIB

Amax ngome peteng dedet
Ape ruen, anakne engkah berajah
Wah bis selapuk rau tejual sandax
Kadu kirim anakne besekolah

Berembe jage ceriten kanak
Ye tekelek six baturne, lok melut
Ndarak demenne, mace ape malik
Lamun te badax ceketne begulut

Luwex ke berajah dung luwex ke lupax
Sekedik ke berajah sekedix ke lupax
Ndex ke berajah dung ndex ke lupax
Mno ongkatne, ya ampoxne te sumpax

Jogjakarta, 29.02.08 Jam 19.10 WIB

Lindur begerek selapux rarut
Bale rebax peken julat
Ketempo selapux ruan dengan
Sax takut gati dait ujian

Belabur sedax dedasanan
Sengax maling rebax leloloan
Berembe ntan plai bejaox
Bale Nuh begulah jangke lex repox

Gunung ngempok teparan kiamat
Marax tembrene, berari rebax
Lamun seneng ndarax bau te badax
Nane jax wayahen te pribasax

Lex gumi paer sax molah irup
Bilang dengan, berembeng sanggup
Langan te peta sax tetu benah
Agen t’ampure six de side Allah

Jogjakarta, 29.02.08 Jam 19.03 WIB