hjunep

Lox Cebok (c|eb|ok) demen gati manto maen bal lex tipi. Bilang lain belagean begentix serempungan si ilonne. Menang Belanda ilone ye, menang Rusiye milu ye ngilon. Bajang sekex ine ye tadah lainan six batur-baturne. Pasu gati ye bagewean dait ibadahne solah mesi. Kedemenanne meta ilmu endah kebut lex desante, jerakne begawean lex bangket lalo doang ye sembayang lex masjid belex. Ruene lex selapux taox si aran main bal sine ye nyengkena jari reraosan, kanak kodex atawe dengan toax selapux beriuk regen ngeraosang pelage serempungan si ilonne.

Kebenderan jerax dengan sholat dohor tuan Kodri si biase ngimamin sholat, milu tokol kance jemaah sax lain lex undak undak masjid. Lox Cebok begejuh pekare pelage bal Sasak sax ye bengaxang, kembexne pade gedax dait gendat. Pokoxne lex andaran nasional pelage Sasak bau te paran paling melut. Ye kalah kalah dirix, ongkat batur batur Cebok.

Sebenarne panteske te ketowanang pekare pekedekan lex tuan aji sax ngimamang sholat te, angen lox Cebok. Lagux six melene rombox penaox nekat bae ye bejulu ndeketin Imam ino. Terus ye beketoan pacu pecek maraxne nyengke jax ketowanang hadis dhoif. Tuan nurge, te beketowan julux, pekare main bal si nyengken arax lex tipi ino. Kire kire sai jax menang lamun Rusiye belage dait Melage?. Imam kemos six peketowanan jemaah sekex ine, lagux sengax bajang sine sholeh, mesti ndarax niatne jax ngetes. Imam mulai becerita base ye ndex girang manto tipi ape malix wayen dengan sholat kemalem, ye manto berite dait lamun arax kejarian sax peren gati, lain ino ndexne wah engat tipi.

Semate jaxne ngajahang doang ye ampoxne mele jawab peketowanan lox Cebok sino. Lagux marax biase lamun arax bajang beketowan Imam masjid sine tulakne beketowan. Mbe kire kire serempungan sax kowatan mainne? Ketowanne Cebok? Nah ino sax ndexte bau dugax ongkat Cebok. Berembe teknis pelage pelagene. Lamun te gitx jax ongkat lox Cebok, terus ndot seberax mikir. Ado Melage bagusan six penggitaxte, tuan.

Ngene bae, coba pedasang sai sax pacuan main antara pelage duwe serempungan sino? Yaox, keduwaxne, pacu maen, tuan. Sai suwean berajah main dait kerepan belage? Melage meno, ongkat Cebok. Nah ino kuncine, bajang Cebok…. Lagux ndexne pedas maksud tuan Kodri, jari ye momot doang mikir. Ngkah  bisang waktu luwex lalox kadu momot, ongkat Imam masjid ino. Taget Cebok terus ne muni, Rusiye sino bagus maenne, sax ngelatih doang te padeyang isix Tsar, maheraje Rusiye. Sepanyol (base Sasak asline Melage) ndah olex jaman te haramang lepang pelot bagus bagus maenne. Mene bae bajang, lemax te anteh pelagean Rusiye dait Melage, sengax ndexte kanggo ngeramal kan, mun ku itung itung aku ne ndex ku taox legu pengeng pekare maen bal, lagux lemax ku  badax rahasiyene. Cebok muni, jari taoxde sai si gen menang tuan? Imam masjid tedox ndex bejawab terusne ulex.

Hawe rurung sax bekendang lex cahye jelo tengari sino, panas gati, six panasne lelah ite berembok. Untung ndarax kerepuk, dait montor jarang liwat jari bersi penggitax. Malikne pade beriuk tokol lex undak undak masjid aranjax ndekte pantes ngeraosang masalah banal lex dalem sesangkok masjid. Bilang jerax sholat Imam ndeot seberax lex deket undax undax pedasang jemaah atawe nyapax atawe sekedar tokol. Cebok
sax tadah belo doxane mudian ye dateng ito. Pas ne ngenat Imam wah lex lawang, jelap ne plai, terus ne langsung bedeket. Tuan, te terusang si ruben ino ndeh? Endengne. Imam langsungne nagngguk.

Jari tuan, Melage menang lagax Rusiye telu kosong. Aneh julux sadexte sekedix analisan side. Yaox kan, aku ne Imam shoalt ndexku cernges ngeraosang maen bal ino. Lagux kire kire bae tuan. Bajang Cebokne jax
maksax gati, aox.

Lamun te pedasang Rusiye sino, ye sapox negeri sax kebut majune lex ilmu dait pulatan (teknologi). Lex bagian olah awak dait kedemenan utame gati ye jari pepadu catur, tennis, senam dait pekedekanlex es dait lex aix.

Duwepulu taon pelage bal ndex arax ape apene lex Rusiye, sengak ndexne beduwe system sax nungke usahe kemajuan lex lambur sekex ine. Indengang olah awak dait pekedekan sax ku sebut barux sino, selapuxne bepelepeberundak (sistematis). Sax aran catur le Rusiye, leamn kank kodex jangke sak jak mate lemak, ye becatur catur dirix. Ape malik tennis dait pekedakan aix, ito balene.

Lamun main bal jax ndarak jamak bau te paran bepelepeberundak, ndekne te rekeng, baruxne mulai leman Amax Putin jari datu tarus te icanin six Allah berkah minyak dait gas belek belak, langsungne jari sugi,  penduduk Moskowa sax biasene maux kepeng 100 dolar jari 1000 dolar sewulan. Kan Abramovich sino gubernur lex penutux Rusiye deket Bering, ye sugih six minyak, ye sino oligargi sak kebut, bilin taisne desane terusne beli serempungan sak belek lex Ingris. Nah lengan waktu sino baruxne muali bani nyewa pelateh six palingbbagus dait mahal. Bandingang isix melage, inget ke bajang, lamun arax dengan Melage
kumpul manto sorax ye beriuk, ” Ole Ole Ole Ole…! Jangke kebut ongkat sino. Asalne Allah, Allah, Allah…sengax ye laex dengan Selam. Maen bal lex Melage wah jari pegawean bilang jelo.

Kire kire dengan Sasak bauke maju maenbalne? Ine pakere mudax bajang, lamun arax system marax ongkatku ngonex selapuxne bau te majuang. Lagux adexang bae jari sekedar kedemenan kanak bajang, sengax ndexte bedowe oligargi sax bau nyulap plagante marax Rusiye sino. Lex Gumi Selaparang sine sax bau te majuang yesino segale ruwen pekdekan sax wah jari uart dait akah tau Sasak. Upame Perisaean, gegasing, bedempe, balapan kaox atu sampi, selapuxne sax bilang dengan Sasak regen gitax. Atawe gendang belex dait sak lain. Lamun ite gedax lex sopox lambur ngkah te gedak lex selapuk lambur. Adexang dengan kowat lex maen bal ite kowat perise atau begasing lagux harus bepelepeberundak.

Ite sine, ape juwak bedowente ite ampahang mesax, ye ampoxne kejarian bebajangte jari minder, timaxne wah dait petutuk gumi, masi baene pade minder. Jangke luwex gati bebajng sax bau terimax gelar Doktor atawe semacem sino. Malah luwex sax jari dengan tajin lex lambur sax jarang te gawex. Lagux kurang arax rase bangge dait hormat lex kalangan rakyat. Jari ku ulang malik bajang Cebok, selapux mesti te beriuk  gawex secare bepelepeberundak.

Jari taokde sai jak menang lex final tuan? Ado kamu jax langsot melem nenaox, te anteh bae lemak lamun wah belage, baru te bahas malik beloan.

Nenex kaji Sax Kuwase Doang Sax Epen Penaox
Marax meno dait ampure

Sax ikhlas

Hazairin R. JUNEP

Glosario

Serempungan – grup, kesebelasan
Legu pengeng – tidak apapun
Bepelepeberundak atau bepelepeundak- sistematis
Banal- hal biasa, kotor
Lambur- bidang

Moshe muni lex anakne: - Anakke sax solah, nane jax wayem merarix kance dedare sax ke pilexangm. Anakne nimbal:- Lagux amax, aku jax merarix kance dedare kemelexanku. - Anakke tunax male, dedare sine anak Bill Gates. -_Aox, lamun meno jax Amax.

Terus Moshe lalo bedait kance Bill Gates. Moshe muni tipax Bill Gates: - Bill, aku beduwe terune sax cocok gati jari semamax anakm. Bill Gates nimbal: - Lasingan anakke masi kodex ndexman wayen merarix dengan! – Inix doang, lagux kanak bajang senuxn ye jari wakil direktor Bank Dunie. - Lamun meno jax bau te atur laun, lemax ke kedex
anakke adexn mele, ongkat Bill Gates.

Meno jarin, Moshe terusne bedait kance Presiden Bank Dunie. Wahne sax kenalang dirixn, muni ye tipax amax presiden no: - Amax presiden, aku beduwe kanak bajang sax ke rekomendasiang sax paling cocok jari wakil presiden bank senixn.

Amax presiden nimbalin: - lagux wah luwex wakilke, malah kelebihan olex sax teperluang! - Mene entan amax presiden, kanak bajang senuxn, ye menantun Bill Gates, menu ampoxke badaxde. -Ssssseberax julux, aox aneh, jax ke bahasen bareh…

Demikian dan maaf,
yang Ikhlas
Hazairin R. JUNEP

Sopox dedare Cine aran Li Li merarix terus endot kance semamax dait inax mentowaxne. Leman waktu sino, Li Li wah ngidap base ye ndexne tao mbenderang dirix kance inax mentowaxne lex pekare ape juwax. Pikiran dait angkune belainan gati, Li Li gedek banget dait ndexne demenang mentowaxne. Li Li endah kerepne te silix isix mentowaxne sino. Jelo liwat, ahad liwat, Li Li dait mentowaxne ndexne wah engkah saling amet dait begejuh. Ape lacur seke suwe seke lenge jarin sesambungan duwe dengan sine, pedahal lex adat Cine, Li Li wajib nurutang selapux pengendeng mentowaxne.

Selapux pesualan dait pegejuhan lex bale, seken nyusahang semamaxne sax miskin. Kejarian wah Li Li ndexne tahan, marax api sax nyale atene sengax te kuasain lalox six mentowax, puputne ye jax gawex sopox niat.

Li Li sugul lalo jok batur amaxne sax sholeh, aran Amax Huang. Amax sino pegaweanne beniage owat tetioxan Cine. Li Li bebadax selapux ihwal sax jari cobaan idupne kance mentowaxne. Terus ne ngendeng asex lex Amax Huang, agene te embeng racun sax ne kawih mungkasang semerix pondehne.

Amax Huang ngindeng indeng sebrax terus kemosne, muni ye, : ” Li Li jax kutulungm dende inges, lagux dengahke sax tonggah dait gawex ape sax ke suruxm gawex”. Li Li nimbalin, ” aox amax, jax ke gawex ape
juwax saxde surux”.

Amax Huang tame boyax selapux sax te perluang lex cecopok sax luwex berisi tetiwoxan gero. Seberax mudi sugulne jaux sundungan kodex. Ye badax Li Li, :” ndexm kanggo jelap jelap sematex mentowaxm, sengax dengan luwex jax was was lex kamu. Meno ampoxke bengm tetiwoxan gero sax luwex sax bau nyematex mentowaxm adeng adeng. Bilang jelo periapang mentowaxm empax atawe manuk terus toloxang sekecot rerebu senixn. Adex ndarax dengan was was lex kamu inges, bilang jelo usaheang bi onyax onyax dait bagus bagus ntan tulung mentowax. Piyaxn jari sahabatm. Ngkahm begejuh dait taatin ape kemelexne, pokokne layanin ye marax datu. Kedemen Li Li dengah ongkat Amaxno. Langsungne ulex terus ne piyax lakaran nyematex mentowaxne.

Ahad begentix ahad, wulan begentix wulan, bilang jelo Li Li meriapang mentowaxne sax maix maix. Li Li inget gati pesen amax Huang, adexne ngkah jangke arax was was lex dengan, jari ne jagax gati perasaanne,
taat lex mentowaxne, maraxne ngelayanin inax mesax dait besahabat.

Wahne enem wulan liwat, suwesane lex bale jari begentix, luwih seneng ye pade. Li Li berajah jagax perasaan pacu pacu, sampe ndex ne wah sili, atawe sepax angenne. Ndexne wah begejuh sekali bae kance mentowaxne, sax nane wah jari dengan towax sax solah ate dait besahabat.

Adat kebiasaan mentowaxne seke solah. Mulaine tersena lex Li Li marax ntan tersena lex anakne mesax. Ye mulai demen becerite lex selapux baturne, base ye beduwe menantu sax paling solah sax arax lex dunie  sine. Li Li dait inax mentowaxne nani sene jari raket gati sesambunganne.

Semamax Li Li milu girang atene gitax sesambungan seninaxne dait inaxne. Sekex jelo Li Li lalo ojok amax Huang dait ngendeng tulung malik. Muni Li Li, ” Amax Huang, tulungke gamax, berembe ntanke adexne ndex mate mentowaxke six racun sino. Ye wah begentix jari dengan solah dait aku endah tresna marax inaxke mesax. Ndexke reda ye jax mate six racun sax ke bengne bilang jelo no”.

Amax Huang kemos dait nganggux anggux. “Li Li ngkahm parap. Ndexke wah mbengm racun. Rerebu sax kebingm senuxn vitamin adexn seke sehat. Sopox sopoxn racun sax arax ye sino sax arax lex angen dait adatm dende solah. Lagux nani jax selapux wah bersi tegentix six tersena, irox asex dait perhatian lex mentoaxm”.

Hikmah : ape si talet mex ye mex petex , ape si mbeng mex ye me terimax!

Glossarium;
Base - bahwa
Mbender – menyesuaikan
Sesamungan - hubungan
Puputne – akhirnya
Tetiwoxan – herbal
Mungkasang – menyelesaiakn
Semerix pondeh – denadam keseumat
Tonggah – teliti, hati hati
Cecopok – kotak
Was was – curiga
Lakaran – rencana
Sampe – sehingga
Sepax – kecewa
Raket – erat

Wallahualam bissawab

Demikina dan maaf

Yang ikhlas,
Hazairin R. JUNEP (04.06.08)