hjunep

Sesangkok Maye sine
ye taoxte sangkep,
Kanggo ite begejoh,
lagux maksudne,
saling ajar bedex
ndex bae te idap,
dirix luwih
ndex te paran,
si lain kurang
Semeno juwex,
Ndex te mudex sili
Sengex tulisan sine
Tipex dengan luwex

Lamun erex selex
Becat isix gentix
Six si kenex
Sai si gowar atene
Pehele belex upexne
Sekex ongkat
Si beu miyex
aten dengan
benar
luwih uteme
Jari te beriuk,
Muni sekex
Ongkat doang
cukup

Pekere motto Lotim sino
Laek Bupeti dengan Banyuwengi
Terus dengan Purwokerto
Deduwexne pesu
Gitax budeye
Jeri taoxne artine
Dait endah
Motto sino
ye te piyex isix
dengan Lotim mesex

Bilang dengan beu
Genti moto sino
Ndex erex halangan
Asal ne bau
Butengang
Bangse Sasak

Sesangkok sine
Luwih 100 dengan
Milu begitax, bece
Dait berangen
Luwex semeton
Asal Loteng dait Lobar
Selapux te beriuk
Ngeresex jari dengan Sasak
Sai mele
Nulis 1000 sejelo
Te pesilex
Sai mele
Bece doang
Endah te pesilex

Syukur te
Lex Nenex
Selamet te
Lex modertor
Dait rehayu
Tipex semeton
Selepuxne
Si tuhu,
Ndexne
Becat nyedi
Timexne
Nderex
Si nulis bagus
Tewe ndex wah,
Nyebut
dese paroxne

Silex semeton jeri
inex emex
ndex girang
becat tempe
ndex girang
becat nyelex
ite sine
sopox pendait
Selebung
batu belex
nderex tadahte
gen gentix
epe si jeri
pendait sine
araxan te
begi tersene
kemos
dait
bedoxe
rehayu
tipex side
selepux
si lex sesangkok
si tao bese Selong
si ndex ngerti
si ndex demen
si kurang culuk
selepux
Sasak rehayu,
rehayu ,
selepux Sasak
side endah,
rehayu

wallahualam bissawab

Wassalamualaikum WR WB

Si ikhlas,

Hazairin R. JUNEP
(Sasak jemex jemex)

Lamun tiwox tersene lex ate
Awang menge cahye benah timax kekelem
Bukax kletek terus tinjal tanax langsung keber
Liwatin gawah gunung dait segare
Lamun wah menge ate
Lawang sorge beriuk te bukax
Ate sax kowat rebax sak peratean
Lamun wah menge angen
Ndarax idap talo ate ape gedek dait sili

Sai sax betinjal terus kelep bilin awak
Bau pedas begitax tilas pelampax mesax
Lamun ate wah menge segerah pengilon jax te belax
Lenge ruen bagus ruen selapux tulax jox aten mesax
Piran te mengeang ate barux te pecak arax salax
Lamun menge ate ndarax jax talo ate
Selapux rue ican Nenex ndarax sax siye
Sai sax tersene dait beselamet lex mase
Lamun menge ate dengan sax irox ape bontah
Ndex perlu pengilon ape ajum, ape malik bepayas
Sengax serngenge dait wulan besopox lex rue

Glossarium :
Bepayas – berhias, bertingkah yang dibuat buat
Bontah - tertawa puas
Irox - gundah, sedih, kasihan
Pengilon – cermin
Peratean – antipati, dengki tanpa sebab yang jelas
Serngenge – mata hari
Talo ate – iri hati atas pencapaian orang lain
Tersene- jatuh hati
Wulan- rembulan

Sengeh tanax bangket sax mulai gero, kanak kanak bekendole
Tebango keketak kelep ojok per baret boyax telage sax embung
Awun putex awang belau, jelo benah seken anget aten dengan matax
Lex bebalex inax mogkax nasi pare bulu meriap jari semeton luwex

Lelakax ate bungah bedoxe tipax Nenex Sax Kuwase
Ndex arax bis rase selamet lex De side sax beng rezeki sabol belumbung
Kokok penox six empax, reban begelanyat udang dit kerujux
Ape sax kurang lex gumi sene, ape juax dateng mesax wahte sax begawean pasu

Gowah gati idap berembok, lapang pemetax semeton jari
Selapux tetalet tiwox mesax, karing te matax dait te mongkax
Kemanukan milu beriux mangan, balang begerundaan jelontax
Jangke tedes gigoh angkut pare sax becer lex eles tanax

Bilang dengan bedait kemos dait besalam, rahayu selapuxde
Lex gumi Selaparang ambur pangan dit kakenan ngonong, kekelep ape lampax
Pire pire dengan mele ndarax jax batesang, pekare pantes ape ndex
Sino ye buax selamet lex De Side Nenex, sax ndex jax bis seterusne.

O Nenex kaji sax kuase, nugrehe, icanin terune dit dedare
Sax jax terusang lime pekare landas borex rahayu sax letne
Jaox langan bai balox lupax ilmu dait agame, ajahan Junjungan tite
Lex gumi Lombox aten manuse, lempeng langan ne, rahayu nurge.

Glosarium

1.borex – jaminan
2. rehayu –selamat sejahtera
3.selamet – terima kasih

Dedare kocet plai lex pesisix, nae putex penox gres
Perau baruxne taex jauxang empax kebelex kapal
Cemoh leger inax amax sax beriuk nendak jax bejual
Amax amax pelele gigoh begerundaan rebutang pesenan pyax pes

Seke belaux gres doron dait runtak, terus plai ndarax rase parap
Persis lex deket godang taox dengan jeleng nyiur begeribaan te jangke sungkur
Deduwaxte rerex dait bikas tegitax six dengan luwex seken te demen
Plainte tulax jox langan sak ngonex terus ulex plai uber lupis dait serabi sak masi anget

Lex kelas sekex ite doang jari bintang, dengan te duwe tokol sebangku
Bangku sax belex bau te tindox lex atasne, arax lowang duwe kiri kawan
Girang te taek lex bangku, lamun arax ribut lex rurung, ape arax ongkat te
Terus bebekel, besodor, bekasti saling pale alex ke meres ne jelo jelo sino

Laut sax sepi dindeng bilang kelemax kenjelo, selun lain ruen jelo sino
Awun awun bideng sebox jelo, lex rurung dengan luwex mulai rocet
Ndarax bau te sadux, ape jax arax, bilang dengan bepesex pesex
Kemos sax piyax seke jeneng telang lex muem, kembex atengke jari anyong rasen

Setaon te besekole, bejorax, nyelodok bawax meja, besebox pete
Bareng te berajah mace dit nulis, arax engkong, dit cix dit koh
Mangan nasi sengeh kadu sambel dit sesaur, jangke bewet, ite cerumeng
Ke tolerm jari kanak, wah te keselem lex telage daot lantaran takut lampit

Kelemax sino jax te mulai sekole, lagux ndarax unin lonceng, ndrax dengan sugul
Tengari sino, nggaxne penggitan pendet bireng marax gunung ngempok
Ulex ku nangis, ndarax bau betulung, selapux takut, ndarax bakex, ndarax jim
Ndarax malix kanak kocet sax plai lex gres pesisix, ndarax sodetku, ndarax sai sai

Jogjakarta, 29.03.08 9.55 WIB

1.Lampit sino ceritene bau nyedot ite tipax dasar telage, ye beruwe ijo marax belex tiper bekelat, terus bau gulung kanak.

2.Pelele dengan sax jual empax besepedah olex laut tipax peken sax jaox.

3.Sodet (sodeut): batur atawa semeton sax rapet gati. Pisax sodet = sepupu dekat

Amax Kangkoeng osap otak anak,
menge anak, lemaxm jari datu
Inak Tegining pejojong bebeyak,
idup anak idup anak laun bi jari datu
Berembe nane amax bolang anak, inak bilin bebeyax
Lamun ngeraos beloan six elor nage, celax batur jangke ancur
Lagux ndex arax jax maju jaux batur, Sengax ape juax te badax teparan pyax pekare.

Dedare kocet teperariang six terune sax menex doang ndex man lempeng
Ribut segubuk dese, aranjax selapux bepese jarin ilax inax amax
Base selapux maran wah jari adat, ndex kanggo badax pulisi dengan,
Ndex suwe waktu plai, selun arax bebeyax nine umbax bebeyaxne.
Lemax tengari kebiyan kemalem, duwe kanax kodex bedowe kanak kodex
Lelah aten anyong tresne, mangan ndarak beras, sakit ndarax keping

Kanak sax jari amak ngamuk, dedare sax jari inax ngelawan, beseang
Kanak nine umbax bebeyax ulex jox inax amaxne.
Marax jelo sax muter olex timux jok bat, ndarax gati hikmah jax ne bait
Kesah kanak umbax anak, yesino kesah tite mesax,
ndarax mele neng, tipax kesah sax lain..