hjunep

Sopox dedare Cine aran Li Li merarix terus endot kance semamax dait inax mentowaxne. Leman waktu sino, Li Li wah ngidap base ye ndexne tao mbenderang dirix kance inax mentowaxne lex pekare ape juwax. Pikiran dait angkune belainan gati, Li Li gedek banget dait ndexne demenang mentowaxne. Li Li endah kerepne te silix isix mentowaxne sino. Jelo liwat, ahad liwat, Li Li dait mentowaxne ndexne wah engkah saling amet dait begejuh. Ape lacur seke suwe seke lenge jarin sesambungan duwe dengan sine, pedahal lex adat Cine, Li Li wajib nurutang selapux pengendeng mentowaxne.

Selapux pesualan dait pegejuhan lex bale, seken nyusahang semamaxne sax miskin. Kejarian wah Li Li ndexne tahan, marax api sax nyale atene sengax te kuasain lalox six mentowax, puputne ye jax gawex sopox niat.

Li Li sugul lalo jok batur amaxne sax sholeh, aran Amax Huang. Amax sino pegaweanne beniage owat tetioxan Cine. Li Li bebadax selapux ihwal sax jari cobaan idupne kance mentowaxne. Terus ne ngendeng asex lex Amax Huang, agene te embeng racun sax ne kawih mungkasang semerix pondehne.

Amax Huang ngindeng indeng sebrax terus kemosne, muni ye, : ” Li Li jax kutulungm dende inges, lagux dengahke sax tonggah dait gawex ape sax ke suruxm gawex”. Li Li nimbalin, ” aox amax, jax ke gawex ape
juwax saxde surux”.

Amax Huang tame boyax selapux sax te perluang lex cecopok sax luwex berisi tetiwoxan gero. Seberax mudi sugulne jaux sundungan kodex. Ye badax Li Li, :” ndexm kanggo jelap jelap sematex mentowaxm, sengax dengan luwex jax was was lex kamu. Meno ampoxke bengm tetiwoxan gero sax luwex sax bau nyematex mentowaxm adeng adeng. Bilang jelo periapang mentowaxm empax atawe manuk terus toloxang sekecot rerebu senixn. Adex ndarax dengan was was lex kamu inges, bilang jelo usaheang bi onyax onyax dait bagus bagus ntan tulung mentowax. Piyaxn jari sahabatm. Ngkahm begejuh dait taatin ape kemelexne, pokokne layanin ye marax datu. Kedemen Li Li dengah ongkat Amaxno. Langsungne ulex terus ne piyax lakaran nyematex mentowaxne.

Ahad begentix ahad, wulan begentix wulan, bilang jelo Li Li meriapang mentowaxne sax maix maix. Li Li inget gati pesen amax Huang, adexne ngkah jangke arax was was lex dengan, jari ne jagax gati perasaanne,
taat lex mentowaxne, maraxne ngelayanin inax mesax dait besahabat.

Wahne enem wulan liwat, suwesane lex bale jari begentix, luwih seneng ye pade. Li Li berajah jagax perasaan pacu pacu, sampe ndex ne wah sili, atawe sepax angenne. Ndexne wah begejuh sekali bae kance mentowaxne, sax nane wah jari dengan towax sax solah ate dait besahabat.

Adat kebiasaan mentowaxne seke solah. Mulaine tersena lex Li Li marax ntan tersena lex anakne mesax. Ye mulai demen becerite lex selapux baturne, base ye beduwe menantu sax paling solah sax arax lex dunie  sine. Li Li dait inax mentowaxne nani sene jari raket gati sesambunganne.

Semamax Li Li milu girang atene gitax sesambungan seninaxne dait inaxne. Sekex jelo Li Li lalo ojok amax Huang dait ngendeng tulung malik. Muni Li Li, ” Amax Huang, tulungke gamax, berembe ntanke adexne ndex mate mentowaxke six racun sino. Ye wah begentix jari dengan solah dait aku endah tresna marax inaxke mesax. Ndexke reda ye jax mate six racun sax ke bengne bilang jelo no”.

Amax Huang kemos dait nganggux anggux. “Li Li ngkahm parap. Ndexke wah mbengm racun. Rerebu sax kebingm senuxn vitamin adexn seke sehat. Sopox sopoxn racun sax arax ye sino sax arax lex angen dait adatm dende solah. Lagux nani jax selapux wah bersi tegentix six tersena, irox asex dait perhatian lex mentoaxm”.

Hikmah : ape si talet mex ye mex petex , ape si mbeng mex ye me terimax!

Glossarium;
Base - bahwa
Mbender – menyesuaikan
Sesamungan - hubungan
Puputne – akhirnya
Tetiwoxan – herbal
Mungkasang – menyelesaiakn
Semerix pondeh – denadam keseumat
Tonggah – teliti, hati hati
Cecopok – kotak
Was was – curiga
Lakaran – rencana
Sampe – sehingga
Sepax – kecewa
Raket – erat

Wallahualam bissawab

Demikina dan maaf

Yang ikhlas,
Hazairin R. JUNEP (04.06.08)

Assalamualaikum WR WB

Lox Mdan, sopox pepadu Sasak sax wah besekole lex Malang ulexne jox Selong, jangox dengan toax sax begax suwe ndexne dait. Sopox galeng tokol tokol ye lex berugax sax te piyax lex bebucun rurung jari taox ngeronde. Kumpul dengan bajang pade ngeraos. Arax sax becatur, beceki dait bedomino. Betarox gantung bateri lex kentokne. Arax sekex kanak sax jangke baos telingane kiri kanan lagux ndexne jerax jerax maen. Ketatalan gati kanak bajang ino pade bisang waktu lex bog dait berugax.

Arak sekex bebajang beketowan lex Lox Mdan, ” Kumbexne ampox side ndex lalo bejumat Mdan? Terus Mdan becerita ye lex batur sax beketowan sino, belo tuturne.

Aku terus doang bejumat wah 25 taon, wah ku dengahang hotib ngeraosang segale ruen pekare, arax jage 1000 luwih hotbah. Lagux sekex sekex ndarax six ku ingetang ape sax wahne ceramahang ino. Sengax meno  ndarax angenku lalo bejumat bis bisang waktu dait tenage semeno juax hotibne ye bisang waktu doang beceramah.

Selapux bebajang sax milo ngotok tadah kembelas lagux Lox Mdan sine dengan te ajin six mengene, jari separo sadu separo ndex batur sax lain nanggepin reraosan ino.

Untung arax sopox dengan sax tokol lex sedin berugax berontex ontex naene, sampixne ngerasax hawe sax mel gati sengax jeraxne ujan ngonex. Ye sino Amax Abung, timax ndexne wah besekole atas atas lagux pacu gatine ngaji dait sembahyang. Dengahang raos Lox Mdan terus ndarax tao nimbalin, langsung ye krem dait ne bagusang petokolne. Terus bae nengeraos maraxne nyadex pengajian.

” Aku wah merarix 30 taon. Epen balengku meriapang aku bilang jelo, mun ku rekeng luwex macem kakenan sang arax jage 30 yu macem periapanne. Lagux ndarax mane mane sopox aku inget menu sax wah ku kaken. Lagux sopox keyakianku, periapan epen balengku sino piyax aku sehat dait kowat bagewean. Lamun epen balengku ndex sadex aku mangan  wah laexku pelot. Semeno juax lamun ndexku lalo bejumat agen ku bau mangan rohani, wah laex gati kumate rohani.

Timax po ndex mex idap ape ape lagux, Nenex kaji Sak Kuwase terus jagax ite, lex mbe juwax.

Keyakinan sino bau gitax sax ndex ketempo, bau percaya lex ape sax mustahil dait nerimax ape juwax sax ndexne mungkin.

Araxan mex besyukur lex De side Nenex sax beng ite mangan badani dait rohani. Lemax piran piran arax setan berontok lex lawang balem, kareng mex muni: Nggaxne Nenex kaji doang taox ku ngendeng dait nyembao.

Yakin lex De Side Nenex marax dengan wute percaye lex serngenge, ndexne kernax begitax, lagux kernax YE te raseang.

Glossarium:

Galeng –sore
Beceki – main ceki
Kentok – telinga
Ngotok- omong kosong di pinggir jalan
Nimbal – jawab
Krem- berdehem
Yu – 1000
Mane mane – bahkan, satupun, hatta
Plot- mati
Berontok – mengetuk
Ketempo- terlihat
Nyembao- berlindung
Wute - buta

Wallahualam bissawab

Demikian dan maaf

yang ikhlas
Hazairin R. JUNEP

Lox Bedul olex desa Pijot, bebale lex memontong deket pengembulan paling belex sax arax lex rerau sax galuh gati. Setutux tebegitax lex musim gero sine nggaxne tanax bangket sax belax belax te obong six
serngenge.

Bilang jelo pegaweanne boyax rebu atawe roman jari impan kaoxne. Seke suwe seke sengke ne maux rerebu gero sengax lowex batur lain sax ingon sesato lex andaran dasan Lox Bedul ino.

Sopox kelemax sugul ye tokol lex sedin jebak balene sampix gitax bangket sax seke gereng six panas surye. Be pesex mesax ye ngeraos: ” Nenex kaji, ngeraos aneh kance aku”. Liwat kedit lex atas otakne  terusne njontox lex lolon bagex sax nyengke bebuax. Kedit sino bepeok peok. Lox Bedul langusng ne nyemprax kedit sino, : “setan alas, tedox tedox cucuk mex, bareh ndex ku dengah ape ongkat Nenex lamunne ngeraos lex aku”. Lagux ndarax suare dengahne.

Leman sino sorak ye muni, : Nenex kaji, ngeraos gamax aneh”. Ngempok guntur lex awang. Lox Bedul besumpax senax lex guntur ino, sengax ndexne bau dengah ape ape. Sampix gerumun tame jok balene, ngantih jangke peteng. Lex kemalem sino sugul ye jox lelambur tengax tengax selak bale dait baran kaoxne. Malik ye muni: ” O Nenex kaji, meletku bedait aneh”. Gumintang njerleng berentep entep lex awang tumben ne nyempoar lalox cahyene. Lagux tau sine ye nunduk dirix , ye ampox ndexne gitax ape ape.

Malikne gedeg atene, terusne sorak marax kowat ape : ” Nenex kaji, petitoxke gamax mukjijat sopox bae”. Beterus bae beranak seninaxne, beduwe anak mame ye! Lagux tau sine ndexne menge menge otakne base
bebayax sino ye te beng isix Nenex, ye wah mukjijat sino, jari upax menuse.

Puse gati angenne dengan sine masi ne sorak, : “Melengke entixDe Nenex kaji, icaninke bau idap De Side Nenex kaji”. Jeraxne muni, liwat hawe sax mel ngosap sangkepne. Lagux dengan sino bolangne muwene andang lain, bongkorinne hawe sax mel ino.

Lox Bedul wah begax suwene jari jemaah andaran Sasak lex duniye maye, jari tokolne lex julun komputerne sampix irox atene, : ” O Nenex kaji, tulung ke gamax”. Pas ne bukax peti suratne, arax pesen olex semeton
jari jemaah lain sax becerite solah solah dait bedoa ihlas agen  rahayu semtonne. Lagux meno ndexne bace malah ne apus pesen batur terusne tulak begawean malik.

Lox Bedul sine sax asline aran Abdullah, ndexne sadar base Nenex Sax Kuwase sino, terus Ye barengin ite, lex kejarian belex ape kodex ape lex kejarian sax ndex pati te pedasang. Lex duniye maye meno masih,
ite terus berahayu tipax semeton jari dait besyukur, ngkah te pade puse atente lantaran bungkusan kejarian ndexne pade six pengarepte mesax. De Side Nenex Sax Kuwase ngeraos lex ite, lagux ujudne sax
jamax jamax dait sax ndex te dugax dugax.

Lex Gumi selaparng sino luwex gati semeton jari sax boyax Nenex, arax sax paran dirirx wah bedait arax sax ndex. Sax ngidap wah bedait girang ne pesiaxang pekare sepele, sax ndexman puas beboyax milu jari
liberal, abangan dait segale rue. Ye ampoxne pade luwexan begejuh sengax te paran dirix kenax mesax, pedahal selapuxne kenax, lagux ye kurang ihlasne pade nerimax kenyataan base ite sine sekedar te
beboyax. Lamun sax tetu wah bedait kan jangke nani ndarax tulax bebadax.

Glossarium:

Gereng = kering kerontang
Pesex = berbisik
Awang = langit
Lelambur = halaman
Selak = celah, antara
Gumintang = bintang
Nyempoar = melimpah, terang benderang
Bara/e = kandang
Puse = putus asa
Menge = terbuka pikiran, cerdas
Base = bahwa
Peti surat = inbox
liberal = islam bebas/liberal
abangan = orang yg tidak kuat keyakinan pada agamanya

Aranne Inax Guru Aminah. Ye ngajahang lex kelas 5 SD, jelo pertame ye ngajahang, muni lex muridne base ye tunax male lex selapuaxan, ndex arax te bedayang sopox kance sax lain. Inax guru tresna lex selapux
murid.

Meno entan selapux guru tepakse lekak ngeraos lex kelas adexne demen angen muridne. Lagux ndex mungkin meno, sengax lex bangku paling julu arax sopox murid dekil ndex keruan ruen. Kanak dekil dait cerumeng sino aranne Lox Acim.

Inax Guru Aminah wah medasang Lox Acim sino olex taon sax uwix, seingetne mule kanak sino ndexne pati bekedek kance batur, kelambine kusut, awakne gemi marax ndexne girang mandix. Lox Acim mulai ye jari
semerix pondeh Inax Gurune. Jangke lamun ulangan Inax Guru nyadex NOL lex kertas jawaban Acim.

Kebiasaan lex sekolahan selapux guru peren gati meriksax hikayat sopox sopox kanak, Inax Guru meriksax hikayat Acim paling bengkis, ndarax angenne jax gitax sbenarne. Lagux wayen pedasang hikayatne, taget
gati Ianx Guru mace lapuran olex guru sax ngajah lex taon taon sax julu. Guru kelas sekex nyeratang: “Acim kanak sax menge, kemosne legi, ye seliwah gati. Selapux tugasne rapi, udep dait terpi… demen gati aku ngajah ye”.

Gurune lex kelas duwe nyeratang: ” Acim murid sax paling hebat, te demen six baturne, lagux girangne jejah angenne sengax inaxne sakit sax ndexne bau teowatin, andaran baleen jari sengke gati”. Gurune lex kelas telu nyeratang; ” Inaxne wah seda, sengke gati tipax kanak sine. Timax kowat gati ye berusahe lagux  amaxne ndexne pati berangen, terus andaran lex bale endah sax ndex bagus jelap jax gangu ye lamun ndex arax care nulung ye”.

Gurune lex kelas empat nyeratang: ” Acim seken mundur te bandingang six batur lain, ruen jax wah ndexne minat besekole. Ndexne beduwe batur dait kerep gati ne tindox lex kelas”.

Nani jax anyong gati perasax Inax Guru Aminah, sewahne bace hikayat Lox Acim. Waktune duwe jelo sax wah lebaran Idul Fitri, biasene kanak kanak jauxang guru kelasne hadiah. Periak atene ngangenang muridne sax sekex sine. Selapux murid nyadex gurune bungkusan jaje atawe ape juax sax bagus bagus kadu bungkus sax jerleng. Nggaxne hadiah Lox Acim sax kadu bungkus bekas, kusut wah ilang warnane.

Inax Guru Aminah, legerne bukax kado lex julun kelas, kanak sax lain mulai sorak memolox olox. Murid lain bontah rerex waktune gitax gelang bengan kance botol kodex berisi minyak wangi seperapat. Jelap Inax  Guru Aminah ngkahang wadean muridne sampixne masang gelang dait ne kadu minyak wangi sino, ngene ongkatne:” Ine ye hadiah si paling bagus sax wah te beng aku six murid selame aku jari guru”. Wah bubaran  berajah Lox Acim ndot lex kelas terusne ngeraos kance Inax Guru: ” Inax Guru, jelo sine side sengeh gati pade sengehde six inaxku”.

Demenne sugul Lox Acim olex kelas, Inax Guru Aminah langsungne nangis suwe gati. Leman jelo sino, Inax Guru, mulai mbait sekedik sekedix waktu lex  pelajaran matematika, mace dait nyerat. Waktu sino ye kadu ngasah asuh murid. Inax guru perenang gati merhatiang Lox Acim.

Kanak sopox sine mulaine arax kemajuan, seken menge pikiranne. Seken jelap bejawab lamunne te ketowan. Lex penutux taon ajaran, Acim berubah jari juare. Gurune sax girang muni base ye tersena pade lex selapux, lagux ne inix, kerna Lox Acim jax istimewa gati jarine.

Setaon sewahsino Inax Guru Aminah nerimax surat lex bawax lawangne, olex Acim, sax nulis ngene: ” Side gurungku sax paling hebat seumur idupku” Enem taon wah liwat, malik ne maux surat olex Acim, badax
gurune base ye maux te terimax lex universitas, dait ” Side grungku sax paling hebat seumur idupku”.

Empat taon jerax sino, arax surat acim malix, bebadax base ye, timax ne sengke gati kuliahne lagux berhasil ye jari juare dait sberax malix jax lulus. Ndexne lupax nyerat: “Side grungku sax paling hebat dait  pavoritku seumur idupku”.

Empat taon wahno Inax Guru nerimax surat. Lex surat ino Acim bebadax base ye beduwe karir bagus dait jaxne lalo belibur. Lex suratne ndah ye nulis base Inax Gurune sax paling hebat dait pavoritne seumur  idupne. Surat te teken six Acim lagux nani jax arax romboxan lex aranne. Dr. Med. Ahmad Hasyim.

Cerite sine ndexman tutux, masi arax surat sax perlu side bace, Acim wah beduwe calon seninax sax seberax malik jax ne nikahin.

Acim nerangang gurune, base amaxne wah seda 2 taon sine, terus ne endeng tulung lex gurune lamun bau jari penggentix inaxne lex upecare akad nikahne.  Ianx Guru Aminah demen gati ye terimax pengendeng muridne sino, cerobax de badex….

Inax Guru Aminah dateng kadu gelang bengan dait minyak wangi sax biase te kadu six inax Lox Acim sino.
Lox Acim, irox asex angenne besalam lex gurune sampixne muni: ” Selamet dait rahayu Inax Guru, sengax side percaye lex aku. Selamet sengax side piyax aku beridap jari manuse sax peren gati jari dengan luwex dait ngajah aku ngubah dirix jari bagusan”.

Inax Guru Aminah nangis, aix matene ngelex, terusne muni: ” Acim, salax mex nune, kamu sax ngajah aku, base aku bau ngubah kejarian. Terus terang bae, ndexku taox ntanku ngajah, jangke aku dait muridku sax soleh sine”.

Glossarium:

Udep = sopan
Terpi = rapi, keren
Semerix pondeh = sasaran kebencian
Hikayat = riwayat
Bengkis = akhir
Wayen = waktu, ketika
Seliwah = unik, istimewa
Sengke = sulit
Jejah = resah, tidak tenang
Andaran - lingkungan
Seda = meninggal dunia
Anyong = hancur luluh
Jerleng = berkilau
Bengan = bekas, lama, tua
Wedean = olok olok
Peren/ang = penting, mementingkan
Badex = tebak

Wallahualaim bissawab

Sak ikhlas

Hazairin R. JUNEP

Sopox jelo lex dalem sekolahan Inax guru nyengke ngajahang. Inax guru becerita masalah taoxte idup, gumi paer dait khewan pepe. Base ite manuse agente pade beriuk jagax titipan De Side Nenex Sax Kuwase  sine. Selapuxte wajib tresne tipax selapux ruen sax arax lex gumi ape sax idup ape sax mate.

Selun selun sekex kanak pejonjong imen terus beketowan; ” Inax guru ape jax sax te paran tresne sino?”. Tadah taget Inax guru six peketowanan kanak kodek, laguk sengke ne boyax jawaban sax pas dait umur kanak sax barux kelas empat SD.

Bareh julux tatix, te sugul julux bekedek, agen side pade seger, ente te lalu ojox kebon deket kokok sino ongkat Inax guru. Dateng lex taox sax kenax, te barisang kanak sino terus Inax guru ngembeng perentah; “kanak kanak nani side pade lalo boyax ape sax side paran cocox jari tekumpulang lex kelas te, ngerti?”. ” Ngerti” sorak kanak kanak sino terusne kelap perarikne tame kebon. Endex arax 10 menit begerundaxan ye pade tulax pete gurune. Sopox sopox te surux maju six Inax guru. “Ape jaux side pade, lapur sekex sekex, siap?” “Siap”

Murid pertame jaux kembang sampixne muni” Inax guru aku maux kembang sax cocox jari pas meja”.  Bagus, ongkat inax guru.  “Aku maux kupu-kupu cocok jari koleksinte lex lemari kace sine” ” Ine anak kedit baungku pas ye gerix olex lolon jewet ” ongkat sax lain.

Selapuk murid wah maju karing sekex kanak nine, tedox bae ndexne mele muni. Inax guru langsun beketowan lex muridne,: Inges, ape jaux bi, makat bi tedox doang, tatix?”

Kemos dait ilax kanak nine sino, ngene ongkatne,; Inax guru, aku wah demak kembang sino, kesolah ruene dait maix gati sengehne, jari ndexku polak ye, sengax bagusan lamunne terus sebarang sengehne, dait seke mekar kembangne. Wah sino gitakku iwok iwok, ke solah keletekne, bewarne warne dait rengas (lincah) kekelepne. Aku adexang ye bae adexne terus bebas. Terus aku lampax kugitax anak kedit gerix, pas ku demax ye, periak atengku gitax inan kedit sax ngendeng asek, langsung ku taekang tipax  kesebune. Inan kedit sino demen gati ye.

Nani sine, aku masih ngambu sengeh kembang sino, aku endah ngidap bebasne iwok iwok sax kekelep lito lite lex kembang sax luwex terus meno juax,… o gamax,… inan kedit sax periak lex anakne sax gerix sino, idapku asex iroxne.

“Lagux Inax guru, berembe ntanku jax petitox selapux sax aku jaux sine?” beketowan kanak sino. Inax guru beang angke sax paling atas tipax muridne sax bau nerangang baturne sekelas. Base ite manuse sine selapuxte ngerasax tersene sax te sebox lex atente mesax.

Wallahualambissawab

Sak Ikhlas
Hazairin R. JUNEP